“మరల వారితో ఇట్లనెను – “మీతో సాక్ష్యముగా నేడు నేను పలికిన మాటలన్నిటిని మీ మనస్సులలో పెట్టుకొని, మీ సంతతివారు ఈ ధర్మశాస్త్ర వాక్యములన్నిటిని అనుసరించి నడుచుకొనవలెనని వారికాజ్ఞాపింపవలెను. ఇది మీకు నిరర్థకమైన మాటకాదు, ఇది మీకు జీవమే. మరియు మీరు స్వాధీనపరచుకొనుటకు యొర్దానును దాటబోవుచున్న దేశములో దీనినిబట్టి మీరు దీర్ఘాయుష్మంతులగుదురు.” (ద్వితీయో 32:46-47)
దేవుని వాక్యము నిరర్థకం కాదు; ఇది జీవమరణాలకు సంబంధించినది. మీరు లేఖనాలను నిరర్థకంగాను లేదా శక్తిలేని మాటలుగాను పరిగణిస్తే, మీరు జీవితాన్ని కోల్పోయే ప్రమాదంలో ఉంటారు.
మన భౌతిక జీవితం కూడా దేవుని వాక్యం మీదనే ఆధారపడి ఉంది, ఎందుకంటే ఆయన వాక్కు ద్వారానే మనం సృష్టించబడ్డాం (కీర్తన 33:6; హెబ్రీ 11:3) మరియు “తన మహత్తుగల మాటచేత సమస్తమును నిర్వహించాడు” (హెబ్రీ 1:3).
మన ఆధ్యాత్మిక జీవితం దేవుని వాక్యము ద్వారానే మొదలవుతుంది: “ఆయన తాను సృష్టించిన వాటిలో మనము ప్రథమ ఫలముగా ఉండునట్లు సత్యవాక్యమువలన మనలను తన సంకల్ప ప్రకారము కనెను” (యాకోబు 1:18). ” మీరు క్షయబీజమునుండి కాక, శాశ్వతమగు జీవముగల దేవుని వాక్యమూలముగా అక్షయ బీజమునుండి పుట్టింపబడినవారు…” (1 పేతురు 1:23).
మనం దేవుని వాక్యం ప్రకారం జీవించడం మొదలవడమే కాకుండా, మనం దేవుని వాక్యం ప్రకారం జీవిస్తూనే ఉంటాం: “మనుష్యుడు రొట్టెవలన మాత్రము కాదుగాని దేవుని నోటనుండి వచ్చు ప్రతిమాటవలనను జీవించును” (మత్తయి 4:4; ద్వితీయో 8:3).
అందుచేత, మన భౌతిక జీవితం దేవుని వాక్యము ద్వారా సృష్టించబడి, నిలబెట్టబడింది, మరియు మన ఆధ్యాత్మిక జీవితం దేవుని వాక్యము ద్వారానే వేగవంతం చేయబడి, సంరక్షించబడుతుంది. జీవమును ప్రసాదించే శక్తిగల దేవుని వాక్యానికి సాక్ష్యమివ్వడానికి ఎన్ని సాక్ష్యపు గాధలను సేకరించవచ్చో!
వాస్తవానికి, బైబిల్ అనేది మీకు శక్తిలేని వట్టి మాటలు కాదు గాని ఇది మీకు జీవమైయున్నది! సమస్త ఆనందానికి పునాది జీవమే. మన సృష్టి మరియు మన భద్రతకంటే అమూల్యమైనది ఏదీ లేదు.
వీటన్నిటికి కారణం దేవుని శక్తిగల వాక్యమే. అదే శక్తితో ఆయన సృష్టి కోసం, మన ఆధ్యాత్మిక జీవితపు ఆహారం కోసం లేఖనాలలో మాట్లాడాడు. కాబట్టి, బైబిల్ గ్రంథం అనేది గాలి మాటలువంటి నిస్సారమైన మాటల పుస్తకం కాదు గాని అది మీకు జీవమై ఉన్నది, అంటే మీ ఆనందానికి పునాది మరియు మీ ఆనందాన్ని పెంపొంచేదిగా ఉన్నది!
