మనం సమస్తాన్ని పరిపాలిస్తాం

షేర్ చెయ్యండి:

“నేను జయించి నా తండ్రితో కూడ ఆయన సింహాసనమునందు కూర్చుండి యున్న ప్రకారము జయించువానిని నాతో కూడ నా సింహాసనమునందు కూర్చుండనిచ్చెదను”. (ప్రకటన 3:21)

లవొదికయలోని సంఘానికి యేసు ఈ మాట చెప్పినప్పుడు, ఆయన చెప్పిన ఈ మాటకు అర్థం ఏమిటి? యేసు కూర్చున్న సింహాసనం మీద కూర్చుంటామా? నిజంగానా?

ఇది బాధలు,శోధనలు మరియు పాపభరితమైన ఆనందాలున్న ఈ లోకంలో  అంతము వరకు తమ విశ్వాసాన్ని కాపాడుకొని, జయించు ప్రతి ఒక్కరికి ఇవ్వబడిన వాగ్దానమై ఉన్నది (1 యోహాను 5:4). అందుచేత, మీరు యేసును నమ్మిన నిజమైన విశ్వాసియైతే, తండ్రియైన దేవుని సింహాసనం మీద కూర్చుని ఉన్న, దేవుని కుమారుని సింహాసనం మీద, మీరు కూడా కూర్చుంటారు.

విశ్వాన్ని పరిపాలించడానికి గల హక్కును, అధికారాన్ని, “దేవుని సింహాసనం” సూచిస్తుందని నా అభిప్రాయం. ఆ సింహాసం మీదనే యేసు కూర్చొని ఉంటాడు. “ఆయన తప్పకుండ పరిపాలించాలి,” “ఎందుకనగా తన శత్రువులనందరిని తన పాదముల క్రింద ఉంచువరకు ఆయన రాజ్యపరిపాలన చేయుచుండవలెను” (1 కొరింథీ 15:25) అని పౌలు ద్వారా రాయించబడింది. అందుచేత, “…నా సింహాసనమందు కూర్చుండబెట్టుదును…” (ప్రకటన 3:21) అని యేసు చెప్పినప్పుడు, సమస్తాన్ని పాలించే విషయాన్ని మనతో పంచుకుంటానని వాగ్దానం చేస్తున్నాడు.

ఇదే విషయాన్ని మనస్సులో పెట్టుకొని, “సమస్తమును ఆయన (యేసు) పాదముల క్రింద ఉంచి, సమస్తముపైని ఆయనను సంఘమునకు శిరస్సుగా నియమించెను. ఆ సంఘము ఆయన శరీరము; సమస్తమును పూర్తిగా నింపుచున్న వాని సంపూర్ణతయై యున్నది” అని ఎఫెసీ 1:22-23 వచనాలలో పౌలు చెప్తున్నాడా?

సంఘమైన మనం “సమస్తమును పూర్తిగా నింపుచున్నవాని సంపూర్ణతయై ఉన్నాం.” ఈ మాటకు అర్థం ఏమిటి? విశ్వమంతా ప్రభువు మహిమతో నింపబడుతుందని (సంఖ్యా 14:21) నేను అర్థం చేసుకుంటున్నాను. ఆ మహిమకు సంబంధించిన ఒక పార్శ్వం ఏమిటంటే, ప్రతి చోట జరిగే ఆయన పరిపాలన, ఎటువంటి అవరోధాలు లేకుండా పూర్తిగా వ్యాపించి ఉంటుంది.

అందుచేత, ఎఫెసీ 1:23వ వచనానికి అర్థం ఏంటంటే, యేసు మన ద్వారా ఆయన మహిమగల పరిపాలనతో విశ్వాన్ని నింపుతాడు. ఆయన పరిపాలనలో పాలుపంచుకున్నప్పుడు, మనం ఆయన పరిపాలన యొక్క సంపూర్ణతగా ఉంటాం. మనం ఆయన పక్షాన, ఆయన శక్తితో, ఆయన అధికారం క్రింద పరిపాలిస్తాం. ఈ విధమైన అర్థంలో, మనం ఆయన సింహాసనం మీద కూర్చుంటాం.

ఈ ధన్యతను, మనం పట్టించుకోవలసిన రీతిలో పట్టించుకోవట్లేదు. ఇది మనకు ఎంతో ఎక్కువ, ఎంతో మంచి విషయం, అద్భుతమైన విషయం. ఇందుచేతనే, “మీ మనోనేత్రములు వెలిగింపబడినందున [వెలిగించబడతాయి], ఆయన మిమ్మును పిలిచిన పిలుపువల్లనైన నిరీక్షణ యెట్టిదో…”  (ఎఫెసీ 1:18) అని దేవుని సహాయం కొరకు పౌలు ప్రార్థన చేస్తున్నాడు.

ఇప్పుడు సర్వశక్తిమంతుడైన దేవుని సహాయం లేకుండా, మనం భవిష్యత్తులో ఏమై ఉండబోతున్నామో దాని యొక్క అద్భుతాన్ని ప్రస్తుతం అనుభవించలేము. కానీ మనం దానిని ఉన్నది ఉన్నట్లుగా అనుభూతి చెందితే, ఈ ప్రపంచం పట్ల మన భావోద్వేగ ప్రతిస్పందనలన్నీ మారుతాయి. క్రొత్త నిబంధనలోని వింతైన, తీవ్రమైన ఆజ్ఞలు ఒక్కప్పుడు కనుపించినంత వింతగా ఇప్పుడు కనుపించవు.